Alles, wat s Du wësse muss
Eng Plaz, déi Mënsche beweegt - firwat BENU?
Eng Plaz, déi Mënsche beweegt - firwat BENU?
Op der Sich no “korrekten”, “gerechten”, “proppere” Produiten a Leeschtungen dauche vill Froen op. Intransparenz, egal wouhin een och kuckt. Wat bréngt eigentlech e Label? Wéi sinn d’Aarbechtsbedéngunge bei der Hierstellung vu Produiten a Liewensmëttel? Wéi eng Alternativen zur Entsuergung vun engem Produit sti mir eigentlech zur Verfügung? Ass et iwwerhaapt méiglech, eppes ze produzéieren, ouni Ressourcen ze verbrauchen?
Dës an änlech Froe beschäftegen eis zanter ville Joren.
Kritiséieren an diskutéieren ass gutt; aktiv ginn an Äntwerte fannen ass besser…
Aus dëser Erkenntnis eraus ass am Joer 2015 d’Iddi vu BENU VILLAGE entstanen: dem éischten Ekoduerf zu Lëtzebuerg an an der Groussregioun! Hei fënns du Äntwerten a virun allem Alternativen.
BENU VILLAGE ass eng Plaz, wou vill ënnerschiddlech Aktivitéiten a Projeten um Programm stinn, déi all am Aklang mat ekologeschen a soziale Wäerter stinn.
Hei gëss Du méi iwwer BENU VILLAGE gewuer!
Wat ass d’Roll vun der BENU Village Esch asbl?
D’BENU Village Esch asbl ass eng Organisatioun ouni lukrativen Zweck. Si begleet BENU bei der Konzeptioun, der Realiséierung an der Kommunikatioun vum Ekoduerf BENU VILLAGE an der Stad Esch-Uelzecht.
D’Ëmsetzung vu BENU VILLAGE gëtt duerch déi generéis Ënnerstëtzung vun der Stad Esch-Uelzecht erméiglecht. Weideren, wäertvolle Support kréie mir vum Ministère de l’Environnement, du Climat et du Développement Durable, dem Ministère de l’Économie et du Commerce, der Oeuvre Nationale de Secours Grande-Duchesse Charlotte an der Fondation André Losch.
D’BENU Village Esch asbl ënnerstëtzt a begleet net just den Opbau vum BENU VILLAGE - se sicht och no neie Weeër. BENU Village Esch asbl initiéiert a begleet Pilotprojeten an nohalteg Aktivitéiten. All BENU Aktivitéit oder Projet baséiert op dëse Wäerter:
- Transparenz
- sozial Verantwortung
- lokal Produktioun
- ekologesch Exzellenz
Wouhier kënnt eigentlech den Numm „BENU“?
„BENU“ gëtt ausgeschwat ewéi den engleschen Ausdrock ‘Be New!’ a bedeit ‘Sief nei!’. De BENU Villchen, deen op eisem Logo ze gesinn ass, entspréngt der ägyptescher Mythologie a gouf - meeschtens an der Gestalt vun engem Reier - schonn an den ägyptesche Pyramiden duergestallt. En ass souzesoen de Virgänger vum griichesche Phönix, dësem wonnerschéinen, roude Villchen, deen zum Schluss vu sengem Liewenszyklus verbrennt, fir aus sengen Äschen ëmmer nees nei z'entstoen.
D’Bild vum Phönix symboliséiert d’Iddi vu BENU!
BENU huet sech enger konsequenter, sozio-ekologescher Kreeslafwirtschaft verschriwwen. Recyclage, UpCycling, „aus al maach nei“ …. Ëmmer nees siche mir no Méiglechkeeten, eppes weider ze gebrauchen a manner nei Ressourcen ze verbrauchen.
Bleif och Du gespaant a looss Dech begeeschtere vun der Innovatiounskraaft vun eisem UpCycling-Duerf, dat sech progressiv als professionell (Konscht-) Bün vu villen ënnerschiddlechen Aktivitéiten entwéckelt. Hei fënns Du lokaalt an innovatiivt Iessen, sozialverantwortlecht Gezei, wat direkt op der Plaz entworf, produzéiert a verkaf gëtt, a nach villes, villes méi!
Bleif mat BENU iwwer Facebook an Instagram, a Kontakt, oder mell Dech fir d' Newsletter. un, déi mir reegelméisseg verschécken, fir iwwer aktuell Aktivitéiten a Projete vu BENU z'informéieren.
